१५ एप्रिलपर्यंत पोलीस कोठडी
सावंतवाडी (प्रतिनिधी) : चोरीच्या गुन्ह्यातील दोन संशयित आरोपींना सावंतवाडी पोलिसांनी कणकवली न्यायालयातून ताब्यात घेतले असून, त्यांना सावंतवाडी न्यायालयात हजर केले असता १५ एप्रिलपर्यंत तीन दिवसांची पोलीस कोठडी सुनावण्यात आली आहे.
ताब्यात घेण्यात आलेल्या आरोपींची नावे राजपूत संतराम पाल (वय ५२, सध्या राहणार घोडदेव नाका भाजी मार्केट, भाईंदर पूर्व; मूळ रा. तौकलपूर नगर, ता. सहगंज, उत्तर प्रदेश) आणि राहुल उर्फ दिवानसिंग ओमप्रकाश तोमर (वय ३६, सध्या राहणार घोडदेव नाका भाजी मार्केट, भाईंदर पूर्व; मूळ रा. गोकुळ गाव, ता. महावल, जि. मथुरा, उत्तर प्रदेश) अशी आहेत.
या दोन्ही आरोपींना सावंतवाडी पोलीस ठाण्याचे उपनिरीक्षक सरदार पाटील व त्यांच्या पथकाने कणकवली न्यायालयातून ताब्यात घेतले. त्यानंतर त्यांना सावंतवाडी न्यायालयात हजर करण्यात आले. न्यायालयाने पुढील तपासासाठी १५ एप्रिलपर्यंत पोलीस कोठडी सुनावली आहे.
दरम्यान, आरोपींकडून चोरीस गेलेला मुद्देमाल हस्तगत करणे, चोरीसाठी
वापरलेली हत्यारे जप्त करणे तसेच इतर ठिकाणीही त्यांनी अशाच प्रकारच्या चोरीच्या घटनांमध्ये सहभाग घेतला आहे का, याबाबत सखोल चौकशी सुरू असल्याची माहिती पोलिसांकडून देण्यात आली. या प्रकरणाचा पुढील तपास सावंतवाडी पोलीस करीत आहेत.
