तळेरे (स्वप्नील तांबे) : आंतरराष्ट्रीय महिला दिनानिमित्त ओझरम ग्रामपंचायतीच्या वतीने एक विशेष कार्यक्रम उत्साहात आयोजित करण्यात आला. या कार्यक्रमाला प्रमुख पाहुण्या म्हणून प्रसिद्ध कवयित्री संध्या तांबे यांची उपस्थिती लाभली. त्यांच्या प्रेरणादायी विचारांनी उपस्थित महिलांना नवी ऊर्जा मिळाली.
कार्यक्रमादरम्यान गावातील विविध क्षेत्रांत उल्लेखनीय कामगिरी करणाऱ्या महिलांचा विशेष सत्कार करण्यात आला. महिलांच्या योगदानाची दखल घेत त्यांना सन्मानचिन्ह देऊन गौरविण्यात आले. महिलांच्या सक्षमीकरणासाठी आणि समाजातील त्यांच्या महत्त्वपूर्ण भूमिकेची जाणीव करून देण्यासाठी हा कार्यक्रम आयोजित करण्यात आला होता.
यावेळी गावच्या सरपंच समृद्धी राणे, ग्रामसेविका पाटील मॅडम, ग्रामअधिकारी जाधव साहेब, महिला मंडळाच्या अध्यक्षा श्रीमती दीपिका दिलीप तांबे, ग्रामपंचायत सदस्य दिलीप तांबे, गावचे पोलीस पाटील तुषार तांबे तसेच ओझरम गावातील ग्रामस्थ मोठ्या संख्येने उपस्थित होते.
ओझरम ग्रामपंचायत ही नेहमीच सामाजिक, शैक्षणिक आणि जनजागृतीपर नवनवीन उपक्रम राबवून गावाच्या विकासासाठी पुढाकार घेत असते. महिला दिनाच्या निमित्ताने आयोजित करण्यात आलेला हा कार्यक्रमही महिलांच्या सन्मानाचा आणि सक्षमीकरणाचा संदेश देणारा ठरला.
महिला दिन हा केवळ उत्सव नसून महिलांच्या कर्तृत्वाचा गौरव करण्याचा दिवस आहे. समाजाच्या प्रगतीत महिलांचे योगदान अत्यंत महत्त्वाचे आहे, आणि त्यांना समान संधी व सन्मान मिळणे ही काळाची गरज आहे. ओझरम ग्रामपंचायतीच्या या उपक्रमामुळे महिलांना प्रोत्साहन मिळाले असून गावात सकारात्मक वातावरण निर्माण झाले आहे.
